" سكيتش " الجماعة

"  الجماعة  "

( المشهد الأول )

يوسف راجل فى الاربعينات متزوج و ماشي فى الشارع  بيجيب طلبا الغذاء لمراته ..

ماشي بيكلم نفسه : انا المفروض اجيب اييييييه ؟؟ يااااه كل شوية انسى ! .. اه هاروح للجزار اطلب 2 كيلو لحمة و بعديها هاطلع عال العطار اجيب كيلو رز و بعديها اروح للبقال اللى اخر الشارع مش اللى فى اوله اجيب نص كيلو طماطم و كيلو خيار و بعدها ارجع على الجزار اخد منه اللحمة و اروح علطول .. و ماروحش هنا ولا هنا عشان متضربش .. ياااااه الحمدلله انى فاكر منسيتش حاجة

يقابله واحد فى الشارع  و يتجه نحو يوسف و يسلم عليه بحرارة و يوسف مش فاكره !

الرجل : ازيك يا يوسف عامل ايه ؟

يوسف ( يسلم عليه و هو متعجب ) : الحمدلله

الرجل : ايه انت مش فاكرنى ولا ايه ؟

يوسف ( محرجا ) : آه طبعا فاكرك ازيك ياااا .. حبيبي والله عامل ايه و انتوا كلكوا كويسين و اخباركوا ايه .. ايام زمان بقى كانت ايام حلوة والله ( و يحضنه )

الرجل : كلهم مين و ايام زمان ايه يا عم  .. المهم  انت رايح فين كده ؟

يوسف : انا رايح اجيب الغدا لمراتى روحية

الرجل : فى حد يا راجل يقول اسم مراته قدام الناس كده

يوسف : امال اقول ايه ؟!

 الرجل : بعد كده ابقى قول على مراتك الجماعة و خلى بالك لو حد سألك قول له أنا رايح أجيب غدا  للجماعة

يوسف : ماشي ياعم من عينيا

الرجل : ياللا مش عايز حاجة .. سلام

يوسف ( يسلم عليه ) : مع السلامة ..

الراجل يمشى .. و يوسف يبص عليه و هو ماشي و يستغرب و يقول : مين ده ؟؟؟

<  يكمل يوسف طريقه و يقابله واحد مخبر و يسأله : انت رايح فييييييييييييين ؟

يوسف ( مستغرب ) : هو فى ايه ليه الناس عماله تسأنى كده انا رايح فين !! .. انا رايح اجيب غدا للجماعة يا سيدى .. هاا اى خدمة انت كمان ؟

المخبر : يا نهار أبوك إسود جماعة و بتقولها من غير حيا  قدامي على القسم

( ويشده جامد و يخده معاه )

( المشهد التانى ) ..

و يدخل المخبر على الضابط : ظبطنا المواطن ده متلبس بإحضار الغدا للجماعة

الضابط : جماعة هاته بسرعة

يدخل يوسف و الظابط يسأله : انت كنت فين يا جدع انت ؟

يوسف : يا باشا انا كنت ماشي فى الشارع فى حالى .. جه الراجل ده سألنى انت رايح فين قولتلوا انا رايح اجيب غدا للجماعة راح ساحبنى عالقسم !

الظابط : وانتوا لسه هتتغدوا دلوقتى الوقت اتأخر اوى .. انا اعرف انكوا بتصحوا بدرى من بعد الفجر و تبدأوا الشغل

يوسف : يا باشا ده كان ايام زمان بقى ..

الظابط : شكلها ليلة فل ان شاء الله .. انت اسم جماعتك ايه يلا ؟

يوسف : لأ يا بيه ما بقولش على إسم الجماعة  بتاعى لحد

الظابط : يعنى ايه مش بتقول اسم لجماعة  لحد انت عبيط يلا

يوسف : يا بيه انا ممنوع اقول اسم الجماعة !

الظابط : وحياة امك .. دانا هنفحك

يوسف : يا باشا لييييه .. مال الجماعة بتاعتى و مال امن الدولة ؟؟

الظابط : نعم ياخويا .. ده امن الدولة اتعمل عشان الجماعة دى بالذات .. دى اخطر جماعة فى العالم كلوا

يوسف : يااالهويييييييي اخطر جماعة فى العالم كلوا !! .. يا باشا اه فعلا مفترية و بتطحنى لما مسمعش الكلام و بنسى حاجة .. لكن قلبها أبيض والله

الظابط : يعنى مش عايز تقول اسم الجماعة !! .. ماشي يا عسكرى تعالى خليع يعترف باين عليه دماغه ناشفة

( العسكرى يضرب يوسف .. و يوسف برضه مش عايز يقول اسم الجماعة ايه )

الضابط يتدخل قائلا  : خلاص مش عاوز تقول إسم الجماعة بلاش طيب سؤال تاني

يوسف ( بعدل هدومه) : إتفضل إسأل يا بيه

الظابط : يا ترى إيه هو حجم الجماعة ؟

يوسف : لا دإنت زودتها قوي يا باشا مقدرش أقول طبعا

( العسكرى يضرب يوسف .. و يوسف يرفض يقول برضه )

الضابط : خلاص انت جبته لنفسك .. خده على الحجز يا عسكرى .. هات بطاقتك يلا

يوسف ( يطلع البطاقة و يبكي ) : اتفضل يا باشا

الظابط ( ينظر فى البطاقة و بفاجئ ) : انت اسمك ايه يلااااااا ؟

يوسف : اسمى  يوسف يا باشا

الظابط : اسمك يوسف حنا بولس !!!!!!!!!!!!

يوسف : و ماله يا باشا

الظابط : يعنى انت مسيحي

يوسف : و ماله يا باشا .. كلنا اخوات فى الوطن

الظابط : و لما نت مسيحى ايه اللى ممشيك مع الجماعة

يوسف : امال امشى مع مين يا باشا .. مش بحبها

الظابط ( يتجنن ) : بتحب مين يا غبي .. انت مش عارف خطر الجماعة دى

يوسف : امال يا باشا مش عايش معاها طول حياتى

الظابط : انت عبيط يلا .. فى حد مسيحى يعيش مع الجماعة المحظورة دى

يوسف : جماعة محظروة !!! .. هو تقريبا فى سوء تفاهم يا باشا .. انا بتكلم عن الجماعة  اللى هى تبقى مراتى

الظابط ( مستغرب ) : ااااااااااااااااه  انت قصدك كده من الصبح .. يا راجل انا بحسبك تبع الجماعة اياها

يوسف : لا يا باشا .. هو الضرب اللى انا خدته  بسبب سوء التفاهم ده

الظابط (مكسوف ) : اديك قولت سوء تفاهم .. ياللا يا راجل حصل خير .. انت ممكن تروح

يوسف ( غاضب ) : نعم يا خويا اروح دلوقتى بعد الضرب ده كوللو .. و بعدين انا لو روحت هاتضرب فى البيت عشان مجبتش الطلبات .. يعنى هتضرب هنا و هناك كمان

( يقوم يوسف غاظبا و يطيح ضرب فى الظابط و العسكرى )

....................

Ahmad Saber

6-11-2011

أن تكون زملكاويا

أن تكون زملكاويا 

- نشأت مثل باقى الزملكاوية داخل مجتمع أهلاوى متعصب عنصري ترى فيه عدد الجالسين دائما فى المقاهى أغلبهم يشجعون النادى الأحمر, اللهم الا زاوية فى نهاية المقهى يجلس مجموعة من الزملكاوية فى ترقب اى هدف لفريقهم المقهور غصبا و بدون مشاريب بالطبع , مجتمع ترى فيه مدرسك فى المدرسة و زميلك فى الفصل و اخوك فى غرفتك و ربما شخص بداخلك من يناديك التخلى عن ناديك المفضل , مجتمع فيه لو كنت راكب ميكروباص مع واحد صاحبك و قالك فى وسط الكلام " يا زملكاوى " ترى كل الركاب ينظرون اليك و فى اعينهم جملة واحدة " هو انت مش من هنا و لا ايه !! " , مجتمع ربما تحرم من المصروف لمدة اسبوع لأنك ضحكت بسخرية على والدك لما الأهلى خسر امبارح من المصري فى بورسعيد - الأهلى مش بيخسر من المصري الا فى بورسعيد -

- أسباب كثيرة تجعلك زملكاوى لا تفرط فى انتمائك و تجعلك تردد كل عام " السنة الجاية هنعوض و المستقبل بتاعنا "

 (1) تصبح شخص مميز و بارز وسط الشلة لأنهم دائما ما يستمتعون بالهزار معك و التريقة على فريقك

 (2) موبايلك مبيبطلش رن من كتر المكالمات و الرسايل بعد كل ماتش 

 (3) مباريات الزمالك لا تحمل فقط مشاهد الحماس و التشجيع انما بعض المشاهد السينيمائية الحزينة كشاب ينهار لضياع بطولة   بالكامل لمجرد لاعب كسل انه يجرى خطوتين زيادة .. او كطفل يحمل يافطة مكتوب عليها " الزمالك يمرض و لكن لا يموت " مشهد لا تستطيع ان تحبس دموعك داخل عينيك

 (4) تجد ناديك يختلف عن كل باقى فرق العالم التى تحتفل بمئويتها ببطولة مع جمهورها او بمباراة مع فريق عالمى و هذا لا يحدث فى الزمالك و هذا ما ينمى بداخلك شعور خالف تعرف

 (5) انت شخص قنوع جدا ترضى بأقل ما قسمه الله لك تجعلك ترضى بالتعادل مع بنى سويف و الهزيمة من بنى عبيد

 (6) انت شخص دائم التقرب الى الله لأنك تحمل الكثير من أمراض السكر و الضغط و مهدد بالموت فى اى لحظة

 (7) تنتمى لنادى لا يملك القدرة على خداع الآخرين فلا يدعى انه قلعة المبادئ  و الأخلاق ثم تجد لاعب من عندك متهم بقضية رشوة و لاعب آخر ممسوك فى شقة مفروشة ( بيقضى ليالى حمرا بدون جمهور )

 (8) المتعة الحقيقية عندما يفاجئك الزمالك بالفوز فى مباراة لا تتوقع الفوز فيها - انت دائما لا تتوقع فوز الزمالك - و بذلك تصبح فرحتك مضاعفة

 (9) لو كنت متزوجا فأنت زوج مثالى لأنك تقضى معظم الوقت بجانب زوحتك داخل المنزل خوفا من الذهاب الى الشغل

 (10) ألا تكون أهلاويا  


Ahmad Saber
14/10/2011

نفسي أتعاطف معاك

نفسي اتعاطف معاك .. نفسي أنزل يوم الجمعة وأقولك أنا أسف

قالولي انزل يوم الجمعة واقولك آسفين يا صلاح عشان مشيناك وطردناك من البلد بشكل مش كويس قال ايه ( اصل انت واحد مننا وميصحش نطردك كده و ان انت من اولاد بلدنا )

- قالولي انك كنت مبتنامش الليل عشان بتفكر فى المواطنين محدودي الدخل

مع ان الأسعار بتزيد يوم ورا يوم ومستوى المعيشة كان بينهار وحكومتك كلها من رجال الأعمال

-

قالولى انك قعدت 30 سنة شايل مصر فى عينيك خايف عليها الاحتلال

مع انك عمال تبيع فى أرض سيناء اللى شبعت من دماء الشهداء عليها .. وبعت أرض طابا اللى انت بنفسك رفعت علم مصر فوقيها

-

قالولي انك بطل من أبطال حرب أكتوبر ولازم نكرمه

مع ان ده شرف ليك انت مش لينا احنا .. وياريتك صنت الشرف ده

- قالولي انك كنت بتقف ورانا فى المحن .. بدليل انك رحت تحضر ماتش مصر و كوت ديفوار سنة 2006 وسايب أهالى العبارة يموتوا من الحسرة على 1300 غريق من ولادنا

  والحقيقة حبيت أتعطف معاك وبدأت أفكر يا ترى لما أنزل واهتف باسمك  هأقول ايه ؟؟ مش لاقى حاجة حلوة ممكن تغفرلك كل

اللى عملتوا فينا طوال 30 سنة

مش قادر أنسى ان حكومتك قطعت علينا الكهربا عشان توفر فى الغاز اللى بيروح لاسرائيل

مش قادر انسى ان عشان اقضى مصلحة لازم أدوخ الدنيا كلها وفى الآخر بتخلص ب100 رشوة

مش قادر أنسى حوادث الطرق و قطارات الصعيد وانت واقف بتتفرج من بعيد

مش قادر أنسى لما عسكري مرور ممكن يوقف دكتور جامعة عشان يسحب منه الرخص بدون مخالفة

مش قادر أنسى انك زورت صوتى فى الانتخابات واديته لواحد ميستحقوش

مش قادر أنسى طوابير العيش  و طوايبر انابيب البوتاجاز

مش قادر أنسى اخواتى اللى هجروا من البلد هجرة غير شرعية لانه خايف من الموت و العيشة فى بلدة

مش قادر أنسى كرامة المصري المهانة فى كل بلاد العالم و كلمة مصري أصبحت زي الشتيمة

مش قادر أنسى انك تقبض على رجال أعمال شرفاء وتحبسهم و تصادر أموالهم وتسيب ناس فى البلد زي أحمد عز وطلعت مصطفى

مش قادر أنسى سرقة أراضي الدولة وانك تبيعها المتر ب50 قرش وهما يبيعوها المتر ب 5000 جنية

مش قادر أنسى عمليات التجميل على نفقة الدولة

مش قادر أنسى البطالة و الواسطة و نظام التعليم الفاسد و تردي الحالة الصحية

مش قادر أنسى خصخصة شركات القطاع العام وسرقة أموال الدولة

مش قادر أنسى المبيدات المسرطنة و خراب زراعة القطن المصري الشهير

مش قادر أنسى الداخلية ومعاملتها للمصريين من تعذيب و بلطحة و ظلم

مش قادر أنسى العنوسة و ظاهرة التحرش فى الشارع المصري

مش قادر أنسى انعدام الثقافة فى مصر وتكريم مطربي العنب و الخيار

مش قادر أنسى اهمال اهل الصعيد اللى حافظوا على تراث مصر مما أدى الى ضياع التراث

مش قادر أنسى المنتجات الصينى المضروبة التى أغرقت الأسواق دون رقيب عن جودتها

مش قادر أنسى عدم محاسبة اى فاسد والاكتفاء بتغيير منصبه

مش قادر أنسى لما عملت مظاهرة و اعترضت على عمليات الحفر تحت المسجد الأقصى بكم انى مسلم كان جزائي الحبس

مش قادر أنسى انى لما نزلت أطالب بحقى بطريقة سلمية ضربت علينا رصاص حى و مطاطي و قنابل مسيلة للدموع وقتلت اخواتنا بدون وجه حق

مش قادر أنسى انك اطلقت علينا بلطجيتك عشان يدبحونا فى ميدان التحرير .. وبتدعى اننا ولادك

قالولي انك تعبان أوي دلوقتى وفى غيبوبة تامة .. اهو انت لما بتتعب ممكن تسافر بره و تتعالج بفلوسنا واحنا لما بنتعب من الأمراض اللى ماليا البلد منلاقيش حد يسفرنا نتعالج على نفقة الدولة ولما نموت نقول معلش

يعنى رئيس دولة يقتل 365 من شعبه بالرصاص

و 9 مليون بالكبد الوبائى

و 8 مليون بالسكر

و يصيب اطفاله باعلى نسبة سرطان اطفال فى العالم

و 85000 حوادث طرق

و 35 مليون جاهل

و 30 مليون معدم

و يتسبب في إنهيار إقتصادنا و يسرق و ينهب أكتر من 60 مليار دولار

و نقول له احنا اسفين

عن اى رد جميل تتحدثوا ؟؟  لو على دم الشهداء فاحنا لو عشنا طول عمرنا نخدم أم فقدت ابنها غدر مش ممكن نوفي بده

اما عن رد جميل من باع شهدائنا ولمن عاث فى الأرض فسادا ... فربنا يسهلكوا

بجد يا ريس احنا لو كان بيحكمنا كلب كان ممكن يحافظ علينا أكتر من كده ..

بجد يا ريس احنا لو كنا طردنا كلب من بلدنا كان ممكن اطلع و اتعاطف معاه .

a.saber

17-2-2011

كن مع الثورة

الموضوع بسيط جدا .. بعد ٢٠ - ٢٥ سنة هتلاقي ابنك او حفيدك جه قعد جنبك وبيذاكر تاريخ وبيقرا درس ثورة ٢٥ يناير التي حررت مصر من الطاغية مبارك ونظامه ..

مجموعة من الشباب ضحوا بأرواحهم من أجل الآخرين ومن أجل ان ينعموا بحياة شريفة حرة ..

وهيبصلك ابنك وهيسألك احكيلي يا بابا عن الثورة ..
وبحكم انك كنت عايش أيامها ومعاصر لأحداثها هيكون ردك واحد من التلاتة




١) هتقوللو انك كنت واحد من الناس اللى ضحت ونزلت وصرخت فى وجه الظلم والفساد وقولت لأ لحد أخر يوم ومتضحكش عليك وتحملت الانتقادات والاساءات لحد ما شفت النور بعنيك ودقت طعم الحرية .. وساعتها هيفخر بيك ابنك لأن ابوه واحد من الناس الأحرار اللى افادوا بلدوا على مر تاريخ مصر

٢) هتقوللو والله انا كنت قاعد فى بيتنا ساعة الثورة ومنزلتش ولا يوم ولا قولت كلمة الحق وطبعا مش هتنسى تتحجج عشان متطلعش جبان قدام ابنك

٣) هتقوللو للأسف يابنى انا كنت بشتم و بنتقد لرجال الثورة دول وكنت بصدق الناس اللي قالوا عليهم انهم مخربين وعايزين يخربوا البلد
و مش كده وبس دانا كنت بحب الطاغية وكنت بتمنى انو يحكمنا كمان وكمان !!! ممكن متقولوش كده وهتضطر تضحك وتقولو زي الراجل الأولاني بس جوه نفسك هتضرب نفسك ب٦٠ جزمة وبتف على شكلك لأنك كنت واحد من الناس اللى وقفوا قدام الحق وكنت فخور بكده

Ahmad Saber 
6/2/2011